Prapancha Telugu

Latest Telugu News & information portal for Indians & NRI’s  

For more information contact :  info@prapanchatelugu.com

వివేకానందుల సాహిత్యం చదివితే బలహీనత దరి చేరదు : గవర్నర్ తమిళిసై

చిన్నతనంలో తన తండ్రి ఇచ్చిన వివేకానంద స్వామి పుస్తకం నుంచే తాను స్ఫూర్తి పొందానని, ఇలా ఎందరికో స్వామి వివేకానందులు స్ఫూర్తి ప్రదాత అవుతున్నారని తెలంగాణ గవర్నర్ తమిళిసై సౌందర రాజన్ అన్నారు. ఆత్మవిశ్వాసాన్ని నింపే స్వామి వివేకానంద సాహిత్యం చదివితే ఆత్మహత్యలే ఉండవని, బలహీనులమని అనుకోవడం నేరమని, స్వామి వివేకానంద ఇదే చెప్పారని గవర్నర్ గుర్తు చేశారు. హైదరాబాద్ రామకృష్ణ మఠంలో అంతర్భాగమైన వివేకానంద ఇన్‌స్టిట్యూట్ ఆఫ్ హ్యూమన్ ఎక్సలెన్స్ 23వ వ్యవస్థాపక దినోత్సవ కార్యక్రమానికి ఆమె ముఖ్య అతిథిగా హాజరయ్యారు. ఆధ్యాత్మికత, సిద్ధాంతాలు, విలువలు, సౌమ్యత, ప్రేమలకు నిలయమైన భారత్‌‌ను స్వామి వివేకానంద ప్రపంచానికి పరిచయం చేశారని ఆమె గుర్తు చేశారు.

 

 

వందేళ్ల క్రితమే స్వామి వివేకానంద సోదరత్వం, ఐకమత్యాన్ని ప్రపంచానికి నేర్పారని గవర్నర్ తెలిపారు. ప్రపంచాన్ని భారత్ మాత్రమే ఏకం చేయగలదని నమ్మిన స్వామి వివేకానంద అది నాడే చేసి చూపారని, నేడు కొందరు తాము భారత్‌ను ఐక్యం చేస్తున్నామని చెప్పుకుంటున్నారని తమిళసై తెలిపారు. సమస్యలను, కష్టాలను చూసి భయపడవద్దని, ధైర్యంగా ఎదుర్కోవాలనే విషయాన్ని వివేకానంద జీవితం నుంచి నేర్చుకోవాలని తమిళిసై సూచించారు. విదేశాలకు వెళ్లక ముందు భారత్‌ను ప్రేమించేవాడినని, విదేశాల నుంచి తిరిగి వచ్చాక భారత్‌‌ను ఆరాధిస్తున్నానంటూ స్వామి వివేకానంద చెప్పిన మాటలను గవర్నర్ గుర్తు చేశారు. స్వామి వివేకానంద విశ్వసించినట్లుగా భారత్ విశ్వగురువు కాబోతోందని, ఆ దిశగా అడుగులు పడటం ప్రారంభమైందని గవర్నర్ చెప్పారు.

 

 

ఆత్మన్యూనత ఉన్న భారత సమాజానికి స్వామి వివేకానంద ఆత్మవిశ్వాసాన్ని, ఆత్మగౌరవాన్నిచ్చారని లోక్‌సత్తా వ్యవస్థాపకుడు జయప్రకాశ్ నారాయణ్ అన్నారు. సత్యం ఒక్కటే అని.. అయితే దాన్ని చేరుకోవడానికి అనేక మార్గాలున్నాయని స్వామి వివేకానంద చాటి చెప్పారని తెలిపారు. దేశభక్తి అంటే పక్కవాళ్లను తూలనాడటం కాదని, భారతీయులంతా ఒక్కటే అనే జాతీయతకు స్వామి వివేకానంద పునాదులు వేశారని జయప్రకాశ్ నారాయణ్ తెలిపారు. రామకృష్ణ మఠం భారతీయ సంప్రదాయంలో ఒక అసాధారణమైనదని జయప్రకాశ్ నారాయణ కొనియాడారు.

 

హైదరాబాద్ రామకృష్ణ మఠం అధ్యక్షుడు స్వామి బోధ‌మ‌యానంద మాట్లాడుతూ… వివేకానంద ఇన్‌స్టిట్యూట్ ఆఫ్ హ్యూమన్ ఎక్సలెన్స్ ద్వారా గడచిన 23 ఏళ్లలో 20 లక్షల మందికిపైగా శిక్షణ ఇచ్చి తీర్చిదిద్దామన్నారు. దేశభక్తిని, సేవను ఆచరణాత్మకంగా చూపుతున్న హైదరాబాద్ రామకృష్ణ మఠం కార్యక్రమాల్లో వాలంటీర్లుగా పాల్గొనాలని ఆయన యువతకు పిలుపునిచ్చారు. కార్యక్రమంలో భాగంగా రామకృష్ణ మఠం పూర్వ అధ్యక్షులు స్వామి రంగనాథానంద జీవితంపై రచించిన మై లైఫ్ ఈజ్ మై వర్క్ అనే పుస్తకాన్ని ఆవిష్కరించారు.

 

Related Posts

Latest News Updates