తెలంగాణ బీజేపీ అధ్యక్షుడు బండి సంజయ్ సిట్ అధికారులకు లేఖ రాశారు. తనకు సిట్ నోటీసులు అందలేదని అందులో పేర్కొన్నారు. మీడియా ద్వారా తెలిసిన సమాచారం మేరకే తాను స్పందిస్తున్నానని పేర్కొన్నారు. 24 న విచారణకు హాజరు కావాలని మీడియా ద్వారా తెలిసిందన్నారు. అయితే.. పార్లమెంట్ సభ్యుడిగా తాను సమావేశాలకు హాజరు కావాల్సి వుందని పేర్కొన్నారు. అందుకే 24 న విచారణకు రాలేనని పేర్కొన్నారు. అయితే… తన హాజరు తప్పని సరి భావిస్తే.. మరో తేదీ ఇవ్వాలని, అప్పుడు వస్తానంటూ లేఖలో స్పష్టం చేశారు.
అయితే.. పార్లమెంట్ సమావేశాలను పరిగణనలోకి తీసుకునే డేట్ ఫిక్స్ చేయాలని సూచించారు. మరో వైపు తనకు సిట్ పై నమ్మకం లేదని, తన దగ్గరున్న సమాచారాన్ని సిట్ కు ఇవ్వదల్చుకోలేదని బండి సంజయ్ స్పష్టం చేశారు. మొదటి నుంచీ సిట్టింగ్ జడ్జితో విచారణ జరిపించాలనే తాను డిమాండ్ చేస్తున్నానని గుర్తు చేశారు. ”సిట్ను నేను విశ్వసించటం లేదు. నా దగ్గరున్న సమాచారాన్ని సిట్కు ఇవ్వదలుచుకోవటం లేదు. సిట్టింగ్ జడ్డితో విచారణ జరిపితే నా దగ్గరున్న సమాచారాన్ని అందిస్తాను. మాకు నమ్మకమున్న సంస్థలకే సమాచారం అందిస్తాం. ” అని బండి సంజయ్ స్పష్టం చేశారు.
TSPSC పేపర్ లీక్ కేసు విషయంలో బీజేపీ అధ్యక్షుడు బండి సంజయ్ కి సిట్ అధికారులు నోటీసులిచ్చారు. పేపర్ లీకేజీ విషయంలో ఆయన వద్ద వున్న ఆధారాలను సమర్పించాలని నోటీసుల్లో పేర్కొన్నారు. ఈ నెల 24 న తమ ఎదుట వ్యక్తిగతంగా హాజరు కావాలంటూ ఆదేశాలిచ్చారు. అయితే… బండి సంజయ్ తన నివాసంలో అందుబాటులో లేకపోవడంతో ఆయన ఇంటి గోడకు నోటీసులు అతికించారు. ఆయన ఆరోపణలకు తగిన ఆధారాలు, ఇతర వివరాలు ఏవైనా ఉంటే దర్యాప్తు బృందానికి ఇవ్వాలని సిట్ అధికారులు స్పష్టం చేశారు. ఒకే గ్రామంలో ఎక్కువ మందికి ర్యాంకులు వచ్చాయని ఆరోపించారు. అంతేకాకుండా కేటీఆర్ పాత్ర వుందంటూ ఆరోపించారు.
అయితే.. పేపర్ లీకేజీ కుట్రలో తన పాత్ర వుందంటూ కేటీఆర్ ఆరోపిస్తున్నారని, ఆ ఆధారాలు సమర్పించాలని నోటీసులిచ్చే దమ్ము సిట్ కి వుందా? అంటూ బండి సంజయ్ సవాల్ విసిరారు. తనపై చేస్తున్న ఆరోపణలకు సంబంధించి కేటీఆర్ ను పిలిచి విచారించే ధైర్యముందా? అంటూ ప్రశ్నించారు. ఈ లీకేజీ కేసులో సిట్ నోటీసుల పేరుతో ప్రతిపక్ష పార్టీల నేత నోరు నొక్కేసే కుట్ర చేస్తోందని మండిపడ్డారు.
