కోవిడ్ తో పార్టీ ఫండింగ్ ఘోరంగా తగ్గిపోయింది.. ఆయా పార్టీలకు ఈ యేడాది ఫండింగ్ ఎంతో వచ్చిందో చూడండి..

కోవిడ్ వల్ల అన్ని రంగాలూ ఘోరంగా దెబ్బతిన్నాయి. ఆర్థికంగా, మానసికంగా కూడా కోవిడ్ అందర్నీ దెబ్బ తీసింది. ఆయా సంస్థలు, పరిశ్రమలు, చివరికి ప్రభుత్వాలు కూడా ఆర్థికంగా ఘోరంగా దెబ్బతిన్నాయి. ఈ దెబ్బ నుంచి ఇప్పుడిప్పుడే మెళ్లిగా కోలుకుంటున్నాయి. అయితే.. కోవిడ్ సమయంలో ఆయా రాజకీయ పార్టీల విరాళాల విషయంలో ఘోరంగా దెబ్బపడింది. దాదాపు విరాళాలు అన్ని రాజకీయ పార్టీలకు సగానికి సగం తగ్గిపోయాయట. 2020-21 ఆర్థిక సంవత్సంలో దేశంలోని గుర్తింపు పొందిన జాతీయ పార్టీల విరాళాలు 420 కోట్ల మేర తగ్గిపోయాయట. ఈ విషయాన్ని అసోసియేషన్ ఫర్ డెమోక్రెటిక్ రిఫామ్స్ సంస్థ పేర్కొంది. గత ఏడాదితో పోలిస్తే 41.49 శాతం తక్కువ అని పేర్కొంది.

బీజేపీకి 2019-20 ఆర్థిక సంవత్సరంలో 785.77 కోట్ల విరాళాలు వచ్చాయి. అదే 2020-21 ఆర్థిక సంవత్సరంలో 477.54 కోట్లు మాత్రమే వచ్చాయి. అంటే గతంతో పోలిస్తే 39.23 శాతం మేర తగ్గింది. ఇక… సోనియా సారథ్యంలోని కాంగ్రెస్ పార్టీకి 2019-20 లో 139 కోట్ల విరాళాలు వచ్చాయి. 2020-21 లో 74.52 కోట్లు మాత్రమే వచ్చాయి. అంటే.. 46.39 శాతం తగ్గిపోయాయి. జాతీయ పార్టీలకు అత్యధికంగా ఢిల్లీ నుంచే విరాళాలు వచ్చాయి. 246 కోట్లు ఒక్క ఢిల్లీ నుంచే వచ్చాయట. ఆ తర్వాత మహారాష్ట్ర నుంచి 71.68 కోట్లు, గుజరాత్ నుంచి 47 కోట్లు వచ్చాయి. అయితే.. దాదాపు పెద్ద జాతీయ పార్టీలకే 80 శాతం మేర విరాళాలు వచ్చాయి. మిగిలిన 20 శాతం చిన్న పార్టీలకు చేరాయి.